Һәр республика, район, ауыл, ҡала үҙенең арҙаҡлы улдары, ҡыҙҙары менән ғорурлана. Сәйетбаба, тиһәк, иң беренсе күҙ алдына 10 яҙыусы тәрбиәләп сығар­ған Жәлил Кейекбаев исемендәге мәктәп күҙ алдына килеп баҫа. Ғорурланырлыҡ уҡыусыларыбыҙ бөгөн дә етерлек. Шуларҙың береһе – Азалиә Аҙнаева. Мәктәптә иң әүҙем уҡыусыларҙың береһе. Шиғри күңелле ҡыҙ ул. Йыл да мәктәп уҡыусылары араһында «Табын» район гәзите менән берлектә Гөлнур Яҡупова ойоштор­ған «Өмөтлө ҡәләм» ижади конкурсында төрлө номинация еңеүсеһе булды. Балалар ижады үҙәге тарафынан үткәрелгән ҡәләм тибрәтеүсе уҡыусылар араһындағы бәйгелә лә I урын алды.

Фәнни-эҙләнеү эштәре менән дә шөғөлләнә Азалиә. Район кимәлендә уҙғарылған «Ғафури уҡыу­ҙары»нда, «Кейекбаев уҡыуҙары»н­да ҡатнашып, II, III урындарға лайыҡ була. Үткән уҡыу йылында Өфөлә Жәлил Кейекбаев исемендәге V республика фес­тивалендә «Халҡым яҙмышында – илем яҙмышы» темаһы буйынса уңышлы сы­ғыш яһаны. Быйыл Жәлил Кейекбаевтың тыуыуына105 йыл тулыуға арнап уҙғарылған республика фәнни-практик конференцияһында ҡатнашып, Башҡорт­остан Республикаһының Халыҡтар дуҫлығы йорто тарафынан Маҡтау ҡағыҙы менән бүләкләнде.
Уҡыуҙа ла һынатмай Азалиә. «Дүртле» һәм «бишле» билдәләренә генә өлгәшә. Тел дәрестәрен ҙур ҡыҙыҡһыныу менән өйрәнә. Әйткәндәй, Ишембайҙағы Әхмәтзәки Вәлиди исемендәге башҡорт интернат-гимназияһы менән берлектә Баш­ҡорт дәүләт университетының Стәрлетамаҡ филиалы уҙғарған 1-се республика олимпиадаһында ҡатнашып, Маҡтау ҡағыҙына эйә булды. «Урал батыр» эпосын яттан һөйләүселәр бәйгеһендә лә I урын алып, төбәк ярышында ҡатнашты.
Бейеү алиһәһе, тиһәк тә хата булмаҫ Азалиә хаҡында. Бәләкәй­ҙән сән­ғәттең ошо төрөн үҙ итә. Мә­ҙәниәт йор­тон­да эшләп килгән «Шаян­дар» түңәрәгендә шөғөлләнә. Гәүһәр Хөрмәтулла ҡыҙы Байбулдина уға «Заһи­ҙә», «Кәкүк», «Бөр­йән ҡыҙ­ҙары» кеүек матур-матур бейеүҙәр өйрәтә. Тәүге уңыштары ла бар. Районда уҙғарылған «Таланттар йәрминкә­һе»ндә I урынға лайыҡ булһа, балалар араһында ойошторолған «Байыҡ» телевизион бейеү конкурсында – «Һығылмалылыҡ» номинацияһы еңеүсеһе.
Азалиә киләсәктә журналист булыу теләге менән яна. Шиғри күңелле ҡыҙҙың теләге тор­мош­ҡа ашыр, тип ышанырға ғына ҡала.

Регина МӘЖИТОВА.
Ғафури районы, Сәйетбабалағы Жәлил Кейекбаев исемендәге мәктәп.