Шым! Имтихан бара!

Был уҡыу йылында 20 меңдән ашыу сығарылыш синыф уҡыу­сыһы Берҙәм дәүләт имтихандары тапшыра. Улар араһында үткән йылдарҙа мәктәпте тамамлағандар бар. Ә 2018 – 2019 йыл­ғы сығарылыш синыф уҡыусылары һаны – 18 мең 396. Холоҡ төҙәтеү колонияларында 237 хөкөм ителеүсе имтихан бирә.

– Башҡортостан тулыһынса яңы технологияларға күсә. Хәҙер БДИ үтәсәк бөтә аудиторияларға ла 2 күҙәтеү камераһы ғына түгел, контроль-үлсәү материалдарын сығарып алыу өсөн принтерҙар ҙа урынлаштырылған. Имтиханда ҡатнашыусылар алдында уҡ эштәрҙән торған бланк һәм яуаптар­ҙы тултырыр өсөн ҡағыҙҙар сығарыла, – тип белдерҙе мәғариф министры Гөлназ Шафиҡова.
Башҡортостандың Мәғариф өлкәһендә контроль һәм күҙәтеү идаралығы начальнигы Айбулат Хажин әйтеүенсә, видеокүҙәтеү системаһы менән 1 мең 430 аудитория тәьмин ителгән. Әлеге маҡсатҡа республика ҡаҙнаһынан 32 миллион һум аҡса йүнәлтелгән.
БДИ тапшырыу өсөн 112 имтихан тапшырыу пункты асылған: шуларҙың 98-е мәктәп базаһында булһа, 9-ы – инвалидтар йортонда, 5-е – колонияларҙа. Йәғни, 2017 йыл менән сағыштыр­ғанда, 2-гә кәмерәк. Былтыр Йылайыр, Яңауыл райондарында тәртип боҙоуҙар күҙәтелеү сәбәпле, унда имтихан тапшырыу урындары ябылған.
Ғәҙәттәгесә, бөтә ун беренсе синыфтар ҙа урыҫ теленән һәм математиканан мотлаҡ һынау үтә. Йәнә 9 фән араһынан үҙе уҡырға барасаҡ йүнәлешлеһен дә һайлайҙар. Мәғлүмәттәргә ҡарағанда, күптәрҙе йәмғиәтте өйрәнеү ҡыҙыҡ­һындыра. Икенсе урында физи­ка килһә, өсөнсөһөндә – биология.
28 май көндө тәүге һынау үтте. Иң беренсеһе – һайланма информатика һәм географиянан. Уларҙы 3 мең 77 һәм 974 уҡыусы тапшырырға теләк белдерһә лә, 2 мең 542 һәм 642 кеше генә бир­ҙе. Хәбәр итеүҙәренсә, имтихан тотҡарлыҡһыҙ һәм тәртип боҙоу­ҙарһыҙ үткән. Һөҙөмтәһе 15 июнгә тиклем билдәле буласаҡ.
30 майҙа ун беренселәр база кимәлендә математика буйынса һынау тотто. Мәғариф министрлығынан белдереүҙәренсә, унда 17 мең 500 сығарылыш синыф уҡыу­сыһы килгән, бер ниндәй тәртип боҙоуҙар теркәлмәгән. Һынау барышын 352 йәмәғәт күҙәтеүсеһе күҙәткән, шуларҙың 15-е – федераль, 51-е – үҙебеҙҙең төбәк, 286-һы – муниципиаль кимәлдәге.
1 июндә математиканың профиль кимәлен һайлағандар көстәрен һынаны. Ундайҙарҙың һаны 12 мең 500-ҙән ашыуға етте. Улар эш һөҙөмтәләрен 18 июндән дә ҡалмай белә аласаҡ.
Урыҫ теленән мотлаҡ һынау ҙа артта ҡалды. 6 июндә унан республикабыҙҙың 18 меңдән ашыу сығарылыш синыф уҡыусыһы һынау тотто. Имтиханға 3 сәғәт ярым ваҡыт бирелде. Ә 4 июнь көнө химия менән тарихты һайлаусылар БДИ бирҙе. Тәүгеһен 3 мең 500 уҡыусы тапшырһа, икенсеһен – 2 меңгә яҡын.
Һынауҙар дауам итә әле, БДИ-ның төп этабы 28 майҙан 2 июлгә тиклем бара. Ҡыҙҙар, егеттәргә һынауҙар­ҙы еңел үтеүҙәрен теләйек.

Добавить комментарий

Ваш e-mail не будет опубликован. Обязательные поля помечены *

*

code